Talaı-talaı sahna tarlandarynyń juldyzyn jaǵyp, baǵyn ashqan qazaq óneriniń qara shańyraǵy M.Áýezov atyndaǵy drama teatryndaǵy mýzeıge bıyl elý jyl tolyp otyr. Qazaq ónerine sanaly ǵumyryn sarp etken sahna sańlaqtarynyń shyǵarmashylyǵy búginde teatr tarıhynyń qalyń qoınaýyna engen. Ǵasyrǵa jýyq jyldardyń syrly qupııasyn qabyrǵasyna búkken teatr mýzeıi kúni keshe kórermenderge esigin aıqara ashyp, jádiger dárejesine jetken asyl buıymdardy qalyń kópshiliktiń nazaryna usyndy.
Abaıdyń «Aıttym sálem Qalamqas» óleńin áýelete shyrqaǵan akterler toby kórermen qaýymdy teatrdyń eki qanatyna tizilgen kórkem dúnıelerdi tamashalaýǵa shaqyrdy.
Mýzeı túnin ashyq dep jarııalap, quttyqtaý lebizin bildirgen teatr dırektory Ashat Maemırov búginde mýzeı qorynda úsh júz myńnan asa qundy jádigerdiń bar ekendigin jetkizdi. Elimizdiń tarıhyn nasıhattaý maqsatynda jyl saıyn 24 mamyrda Mýzeı kúnin atap ótýdi josparlap otyrǵan teatr basshylyǵy mýzeıdiń alǵashqy janashyry Zeınep Moldabaevaǵa arnaıy Alǵys hat tabys etip, ómirden ótken sahna sańlaqtaryna tıesili buıymdardyń etek-jeńin jınap, kóziniń qarashyǵyndaı qamqorlyq jasap, júıelep júrgen mýzeı jetekshisi Nargız Tamabekqyzyna shapan jaýyp, qurmet kórsetti.
Mýzeıdegi eń kóne kostıým «Amangeldi» fılmindegi Elýbaı О́mirzaqov kıgen eki shapanǵa toqsanǵa jýyq jyldyń júzi bolypty. Al sahna sańlaǵy Serke Qojamqulovtyń grımerlik bólmesindegi sary shapany, oryndyq, aınasy jáne t.b. buıymdary jáne de shamasy ótken ǵasyrdyń 60-shy jyldary bolýy kerek, Á.Mámbetov, Q. Badyrov, t.b. teatr tarlandary áńgime-dúken quryp otyrǵan kreslo ótken kúnderdiń habarshysyndaı menmundalaıdy.
Mýzeı eksponattarymen kelýshilerdi tanystyrǵan Qazaqstannyń Halyq ártisi Asanáli Áshimov sahna tarlandarynyń ıisi sińip, kıesi juqqan kıimderi men buıymdaryna zer sala qarap, «Árqaısysymyz úshin mańyzy joǵary osynaý qadirli buıymdarǵa men beı-jaı qaraı almaımyn» dedi tebirenisti únmenen. Al Qazaqstannyń Halyq ártisi Sábıt Orazbaev «Bul jádigerlerdiń elimiz tarıhynda alar orny erekshe, bizdiń baǵa jetpes altyn qorymyz» dep mýzeı sóresinde sap túzegen ár jyldardaǵy spektaklder afıshasyna kórermenderdiń nazaryn aýdardy. Sonymen birge Á.Mámbetov qyzmet etken jyldardy eske túsirip, talantty rejısserdiń teatrdyń baǵyna bitken erekshe tulǵa ekendigin aıtyp, shaǵyn estelikterimen bólisti. Mýzeı jetekshisi N.Tamabekqyzy teatrlandyrylǵan kórinis barysynda Sábıra Maıqanova, Nurmuhan Jantórın, Sháken Aımanov, Hadısha Bókeeva, Sholpan Jandarbekova, t.b. sahna sańlaqtarynyń spektaklderde kıgen kostıýmderimen tanystyrdy.
Áserge toly mýzeı túni kelýshiler teatr metrleriniń maıly boıaýmen salynǵan portretterin, medaldary, marapattary, alǵys hattary, jáne qoldanǵan buıymdaryn kórýge múmkindik aldy. Munda sonymen qatar teatr qurylǵan kúnnen bergi aralyqtaǵy kezeńderdi qamtıtyn ár spektaklden túsirilgen fotolardyń qory tipten mol. Teatr akterleriniń ómirbaıany, oınaǵan rolderi, suhbattary men maqalalary, kúndelikteri men qoljazbalary, t.b. myńnan asa jádigerdi tamashalaǵanda ózgeshe bir álemdi tanyǵandaı kúı keshetinińiz anyq.
Elmıra Serikqyzy,
«Egemen Qazaqstan»
ALMATY